Belorusio vokas helpon

Okuloj de la tuta mondo turinitaj estas direkte de Tibeto. Tamen similaj kuelaĵoj okazas jam de kelkaj tagoj en Belorusio.

Marde milico en Minsko dispelis kelkmilpersonan manifestacion de opozicio. Arestitaj estis 30 homoj, laŭ la registaro, kaj pli ol 100 laŭ la opozicio. Multaj trafis al ĉefurbaj hospiptaloj. La demonstracion organizis demokratiaj organizaĵoj por omaĝi la 90-an proklamdatrevenon de la Bjelorusa Popola Respubliko. Ili traktas la 25-an de marto kiel tagon de sendependeco.

Sekvan tagon komenciĝis traserĉado en redaktejoj kaj en loĝejoj de ĵurnalistoj de sendependaj amaskomunikiloj. Arestitaj estis ĉirkaŭ 30 homoj, ĵurnalistoj de radio Svoboda, radio ERB (Eŭropa Radio por Belorusio), agentejo BielaPAN kaj polaj radio Racja kaj Bielsat TV.

Pro scivolemo mi aŭskultis mardan, merkredan kaj ĵaŭdan pollingvajn elsendojn de la ŝtata belorusa radio. Ĉu ili almenaŭ unufraze mencios pri la okazaĵoj? Ĉu almenaŭ malveran informon peros? Tute ne… Belorusa socio vivas en feliĉo kaj prospero, evoluiĝas kunlaboro kun Kubo, Libio kaj landoj de Proksima Oriento. La ŝtato nur iomete suferas pro usonaj sankcioj…

Ĉu en Minsko devas okazi Olimpikaj Ludoj, por ke la mondo tion rimarku?

Advertisements

~ de LukiZ pri vendredo, 28 Marto 2008.

7 komentoj to “Belorusio vokas helpon”

  1. Kara Lukiz,
    Dankon pro la vizito kaj komento en mia blogo. Via paĝo belaspektas kaj estas interesa. Mi aldonos ligon al ĝi de sur mia paĝo.

  2. Mi ofte timas tro simpligxon de aferoj, tamen ne eblas dementi ke Belorusio estas regata de despotoj. Mi esperas sxangxon tie.

  3. Kara LukiZ! Bonega teksto!
    La kruelaĵoj en Bjelorusio ne okazas de kelkaj tagoj, sed de multe da jaroj… Jes, la vero estas, ke mondo forgesis kaj senĉese forgesas pri tiu ĉi lando. Bonege mi konas, kio okazas en Bjelorusio, ĉar de tempo al tempo mi havas kontakton de tieaj liberecanoj kaj punkuloj, kiuj same kiel geaktivuloj de ekz. Nacia Fronto, havas problemojn, estas arestataj de aĉa reĝimo de Lukaŝenko…
    Batalo kun komunista reĝimo en Bjelorusio neniam haltiĝos – ĝis la momento, kiam la sistemo de totala kontrolo kaj polica ŝtato ruiniĝos… Ni devas memori pri ĉiuj, kiuj suferas ankaŭ tie!
    Represioj en Tibeto kaj en Bjelorusio havas la saman fivizaĵon: KOMUNISMO. Batalo kun sklaveco sub komunista boto devas daŭri kaj fakte daŭros!
    Kun liberecana, amikaj salutoj!

  4. Estas tamen malsimilo inter Belorusio kaj Tibeto. En Belorusio la homoj suferas pro malbona vivo kaj despota regado. En Tibeto la homoj precipe suferas pro la malaperigado de ilia kulturo kaj la detruado de ilia popolo per masiva enmigrado de ĉinoj. Kun aŭ sen despota regado, Belorusio havas estonton kiel popolo, sed pri Tibeto oni ne certas.

  5. Al Lukaso:
    Kompreneble la kruelaĵoj daŭras de multaj jaroj. Parolante pri lastaj tagoj mi pensis pri intensigo ligita kun la proklamdatreveno de Belorusa Popolrespubliko.

    Al Gebeleizis:
    Certe estas malsimiloj inter tiuj landoj, tamen fakte tion, kion Vi menciis, mi opinias similaĵoj. Samkiel en Tibeto, belorusoj suferas pro malaperigado de ilia kulturo kaj detruado de ilia popolo. Lukaŝenka celas integrigi Belorusion kun Rusio kaj krei el ili unu ŝtaton. Por rusigi belorusojn li efektivigis “egaligon” de la belorusa kaj rusa lingvoj, kio fakte signifas anstataŭigadon de la belorusa lingvo kaj kulturo per la rusa. Fermitaj estis altlernejoj, kie oni instruas beloruse. Persekutataj estas multaj artistoj kreantaj beloruslingve. Por plie malligi belorusojn kun sia kulturo, Lukaŝenka anstataŭigis belorusajn naciajn simbolojn per simboloj el la sovetunia epoko. Belorusa blanka-ruĝa-blanka flago estas malpermesita. Kaj ja tio estas nur ekzemploj por detruado de la belorusa kulturo kaj popolo.

  6. » Mi esperas sxangxon tie.

    Mi esperegas, ke la ŝanĝoj en Belorusio ne okazus laŭeble plej longe. Ĉar «demokratiiĝo» plej ofte signifas kaoson, amasan malriĉiĝon, foje ankaŭ eksterlandan militan enmiksiĝon. Rememoru ĉiujn lastajn okazaĵojn, kiam iu “despota” lando demokratiiĝis…

    » Lukaŝenka celas integrigi Belorusion kun Rusio kaj krei el ili unu ŝtaton

    Certe li celas fari tion nur laŭvorte, kaj lastatempe li ŝajne ne tro insistas. La lando estas ekonomie tre sukcesa, kun malpli alta ol en Rusio krimnivelo kaj sen la problemoj de grandega ŝtato, kiun ĝi nepre heredus unuiĝante kun Rusio.

  7. Saluton Slavik!
    Mi ege ĝojas, ke Vi trafis al mia blogo. Mi aparte ŝatas legi Vian blogn, malgraŭ ke ne ĉiam mi samopinias ;)
    Rilate al la integrigo de Belorusio kun Rusio fakte Lukaŝenka pli ofte esprimadis tian deziron kiam ankoraŭ regis en Rusio Boris Jelcin, ĉar Lukaŝenka esperis transpreni lian postenon. Nun klaras, ke en tia unuĝinta ŝtato li plenumus nur rolon de ordinara provincestro, do li ne plu tiom volas la integriĝon.
    Al Via opinio pri demokratiiĝo mi komencis skribi respondon, sed ĝi evidentiĝis iom tro longa, do mi respondos per aparta blogenskribo.

Komentado estas fermita.