Blanka barĉo

Nuntempe pro ekzamenoj en la universitato mi iom forestas de la reto kaj ne havas tempon blogi. Tamen tio estas bona okazo por publikigi recepton, kiun mi “ŝuldas” al la legantoj ;) En la 2-a parto de mia postsomera rakonto mi skribis, ke dum MIRO “okazis festivalo, kie oni povis gustumi manĝojn de diversaj landoj. Ni preparis supon – blankan barĉon (baldaŭ mi publikigos recepton) kun ovoj.” Tiu “baldaŭ daŭris preskaŭ jarduono, ĉar mi simple tute forgesis pri tio. Tamen pli bonas malfrue ol neniam ;) Do jen la recepto:

Blanka barĉo servita en pano

Blanka barĉo servita en pano

pole:

  • biały barszcz [bjaŭi barŝĉ]
  • żur [ĵur]
  • żurek [ĵurek]

Kial diversaj nomoj?

Blanka barĉo estas supo preparita el flaruna fermento, havanta karakterizan acidan guston. Ne estas klare, ĉu żur kaj barszcz biały estas samaj supoj. Laŭ unu el tradicioj, tiujn nomojn oni uzas por la sama supo. Tamen laŭ alia tradicio żur estas bazita sur sekala flaruno kaj barszcz biały sur tritika flaruno. Ankoraŭ aliaj opinias, ke żur signifas fastan supon kun ovo aŭ terpomoj kaj barszcz biały signifas supon kun kolbaso. Do tiu diferenco en nomoj ne estas klara.

De kie ĝi venas?

Blanka barĉo estas tradicia ĉefe por kuirartoj de Pollando kaj Ĉeĥio. Ĝia pola nomo żur venas de malnovgermana vorto sūr, nuntempe sauer – acida. En Ĉeĥio tiu supo estas konata sub nomo kyselo (de la ĉeĥa vorto kyselý – acida). Blanka barĉo havas diversajn variantojn dependajn de regiono, do prezentita ĉi-sube recepto estas nur unu el ili.

Flaruna fermento

Flaruna fermento

Recepto

Konsistaĵoj de fermento:
3/4 glaso da sekala flaruno, 2-3 ajloj, 2 glasoj da varma akvo, 1 dika peco de sekala pano.

Konsistaĵoj de supo:
1 karoto, 1 petroselo, 1 celerio, 1 poreo, 1 cepo, 10-15 dag da fumigita porkflankaĵo (ne uzata en vegetarana versio),  3-4 grajnoj da pimento, 3-4 grajnoj da pipro, 1 laŭrfolio, 6 glasoj da akvo, 3 kuleroj da acida kremo

Fermento:
Meti flarunon al bokalo, verŝi akvon al ĝi kaj meti ajlon. La bokalon fermi per pura tolo kaj lasi por unu semajno en varma loko.

Supo:
Boili akvon kun legomoj, scpicoj kaj porkflankaĵo. Tra kribrilo aldoni fermenton, boili kaj aldoni kremon. La supon eblas servi kun ovoj, terpomoj aŭ pecoj de kolbaso (prefere blanka).

Tian tradician recepton ni publikigis en receptlibro eldonita de MIRO-organizantoj. Kompreneble pro evidenta maleblo prepari fermenton unu semajnon pli frue, anstataŭe ni uzis solveblan pulvoron de Knorr ;) Ĉiukaze bongustegis :) Se iu dezirus printi kaj prepari blankan barĉon, mi publikigas pli taŭgan por trio PDF-dosieron. Rezultojn de eventualaj provoj bonvolu priskribi en komentoj :)

Advertisements

~ de LukiZ pri sabato, 14 Marto 2009.

2 komentoj to “Blanka barĉo”

  1. dankon pro la diskonigo. mi tamen ankoraŭ ne provis.

    se vi ne promesis ekskluzivon al “miro”, ĉi tiu recepto bone taŭgus ankaŭ en vikimedia kuirlibro http://eo.wikibooks.org/wiki/Kuirlibro

  2. Sal!
    Mi certe enmetos tion al la kuirlibro. Tamen mi faros tion, kiam mi havos iom pli da libertempo. Tie sub nomo “barĉo” jam estas alia supo, do necesos fari iun ĝeneraligan paĝon.

Komentado estas fermita.