header image
 

Longa semajnfino - brila ideo

Poloj estas tre inventemaj. Ĉiujare fine de aprilo (kaj precipe dum ĝia lasta tago) multaj poloj streĉiĝas plenumante impostdeklarojn kaj viciĝante en oficejoj por doni ilin. Jes, oni rajtas tion fari dum 4 monatoj tamen plej multaj lasas tion por la lasta tago. Eble ili ĝojas revidi tiun amason da homoj. Mirinde ĉi-jare tio iris sufiĉe glate. Mirinde, ĉar okazis striko de oficistoj. Ne laboris de 30 ĝis 75 procentoj de oficistoj depende de impostoficejo. Feliĉe tiun 3-tagan strikon ili anoncis pli frue, do eble ĝuste dank’ al tio, malkiel kutime, pli multaj poloj solvis la aferon kelkajn tagojn pli frue. Tiam ili povis jam senstreĉe pensi pri ege bela pola kutimo: maja longa semajnfino.

Maja longa semajnfino kreiĝis dank’ al grupiĝo de tri festoj. La unua de majo, samkiel en multaj aliaj landoj, estas Tago de Laboro. Ĝi estas libera, do multaj ĝuas Ĉefe nelaboradon tiutage.

Ĉi tie oni povas rimarki iom malaperantan kutimon de unua maja manifestacio. Ĉiam malpli da maldekstrulaj aktivuloj vens manifesti. Tamen aliflanke ĉi-jare okazis sufiĉe multe da malgrandaj manifestacioj, ĉar antaŭ nelonge maldekstrulaj partioj denove iom multiĝis per divido.

Alia kutimo ne malaperas. Vetero kiel ĉiam primokis ĉiujn, kiuj decidis pasigi longan semajnfinon en la naturo. 1-an de majo posttagmeze hajlis. Dum sekvaj tagoj iom pluvis. Do kiel kutime…

La 2-an de majo ni festas Tagon de Flago, kiu bedaŭrinde almenaŭ oficiale ne estas libera de laboro, sed inventemaj poloj kutimas preni liberan tagon por la 2-a de majo, ĉar…

La 3-an de majo ni solenas datrevenon de la unua en Eŭropo kaj dua en la mondo konstitucia traktato. Eble ne multaj eksterlande tion scias, sed la Tria Maja Konstitucio proklamita en la 1791-a jaro estis (post usono) la dua en la mondo. Tio kompreneble jam estas oficiale libera tago, do prenante nur unu liberan tagon en laborejo (la 2-an de majo) oni havas minimume 3 liberajn tagojn.

Ĉi-jare bedaŭrinde la 3-a de majo estis sabate, do aldoniĝis al tio nur dimanĉo kaj ni havis 4-tagan semajnfinon. Plej oportune estis pasintjare, kiam la 1-a de majo estis marde kaj la 3-a - ĵaŭde. Tiam, prenante 3 liberajn tagojn (lundon, merkedon kaj vendredeon) oni povas ĝui 9-tagan “longan semajnfinon”. Semajnfino pli longa ol tradicia septaga semajno - brile ĉu ne? ;) Tia bela okazaĵo ripetiĝos en la 2012-a jaro, do mia jam antaŭgojas tiom longan semajnfinon.

Sed, por ke mi ne devu tiom longege atendi ĝis tiu longega semajnfino, helpos al mi religia festo Corpus Cristi, kiu okazos ĵaŭde la 22-an de majo. Do prifajfante vendredan lecionon en universiatato mi havos 4 liberajn tagojn, kiujn mi pasigos boatumante en Litovio. Mi ŝategas longajn semajnfinojn :)

Kaj al vi, karaj legantoj, mi havas demandon. Ĉu en aliaj landoj ankaŭ ekzistas tia kutimo? Ĉu ĉiam kiam aperas okazo oni kreas “longajn semajnfinojn”?

La 7-a PEJ-kunevno fine de majo

Eble legas mian blogon iuj polaj gejunuloj kiuj ankoraŭ ne ricevis tiun informon, do mi tuj anoncas:

Fine de majo okazos en Varsovio sekva Kunveno de Pola Esperanto-Junularo. Pasis jam 2-jara kadencio de la nuna Estraro, do venas tempo elekti novan. Inter alie tiucele ni invitas vin por la semajnfino de la 30-a de majo ĝis la 1-a de junio. Bonvolu jam rezervi tempon :)

Pli detalaj informoj venos jam baldaŭ.

Dume Vi povas ekscii, kiel aspektis la antaŭa PEJ-kunevno, kiu okazis en Malborko. Tiucele mi rekomendas raporton en RAR formato (5,13 MB) aŭ ZIP formato (6,11 MB) kaj fotojn.

Demokratiiĝo - ĉu indas?

„Mi esperegas, ke la ŝanĝoj en Belorusio ne okazus laŭeble plej longe. Ĉar «demokratiiĝo» plej ofte signifas kaoson, amasan malriĉiĝon, foje ankaŭ eksterlandan militan enmiksiĝon. Rememoru ĉiujn lastajn okazaĵojn, kiam iu “despota” lando demokratiiĝis…” - tian komenton lasis Slavik ĉe mia antaŭa enskribo „Belorusio vokas helpon”. Ĉu vere estas tiel? Rigardante „lastajn okazaĵojn” per kiuj Slavik verŝajne celis ekzemplon de Irako, oni povas tiel konkludi. Sed ĉu tio signifas, ke la sama scenaro okazus en Belorusio?

Miaopinie tiel ne eblas kompari. Situacioj de Belorusio kaj Irako absolute malsamas. Mi prefere koparus Belorusion al aliaj landoj de la mezorienta Eŭropo, kiuj jam spertis demokratiiĝon kaj nun ni povas vidi, kiel tio efikis. Pollando sukcesis demokratiiĝi en la 1989-a jaro kaj ekonomie komenco estis tre malfacila. Falis multaj ŝtataj entreprenoj, kies funkciado estis simple neracia. Postenojn perdis multaj homoj, kiuj aŭ neniam en sia vivo vere laboris, aŭ ilia laboro ne estis bezonata. Aliflanke aliaj ĝuste dank’ al tio povis utuiligi siajn talentojn aŭ laboremon por vivi multe pli bone ol antaŭe.

Rigardante ĉi ĉion el la ekonomia vidpunkto de post preskaŭ 20 jaroj klare videblas, ke Pollando faris grandegan civilizan paŝon antaŭen. Samo okazis en aliaj landoj de mezorienta Eŭropo. Ĉu en iu ajn el tiuj dekkelk landoj plejmulto de socio bedaŭras demokratiiĝon?

Kaj ja tiuj estas nur ekonomiaj avantaĝoj de demokratiiĝo, ĉar politikaj avantaĝoj almenaŭ por mi ŝajnas memkompreneblaj. Ĝuste tial mi esperas, ke Belorusio sekvos ekzemplon de aliaj landoj de nia regiono kaj baldaŭ demokratiiĝos.

IJK 2009 en Liberec’!

Kaj ni sukcesis :) Merkrede Vespere Vildana Delalić (TEJO-estrarano por kongresoj) anoncis tiun ĝojigan decidon de TEJO-Estraro. La projekto preparata de Marek Blahuš, Julia Hell, mi kaj aliaj LKK-anoj ĝis lastaj momentoj de marto (ni forsendis la invitilon je la 23-a 59 ;) ) evidentiĝis le plej bona el la proponitaj. Do la 65-an IJK-on organizos kune Ĉeĥa, Germana kaj Pola Esperanto-Junularoj en la ĉeĥa urbo Liberec’. Liberec’ troviĝas en montara regiono, kie kuniĝas landlimoj de tiuj tri landoj.

Por poloj tiu nomo estas konata pro la skisaltejo, kie multajn sukcesojn havis Adam Małysz. Tamen ankaŭ por ĉiuj ceteraj Esperantistoj Liberec’ povas soni iom kompreneble ;) Kaj ĝuste tial ĝi rolos ankaŭ kiel temo de la kongreso.

Mi jam nun antaŭĝojas kunlaboron en la teamo, kiun ni sukcesis kolekti por la projekto. Aparte feliĉigas min konsisto de la programa teamo, ĉar kun tiuj homoj mi plej multe kunlaboros. En ĝi troviĝas inter alie Agnieszka Rzetelska (por la distra programo), Carsten Mischke (por movada kaj tema), Rolf Fantom (por vespera kaj nokta) kaj Luisa Rund (por la programtabulo). Kun tiaj homoj ĉio devas sukcesi ;)

Do jen aperis sekva temo pri kiu mi informos en mia blogo :)

Retradiaj elsendoj de Varsovia Vento

Jam de pli ol 2 jaroj aperas en la reto elsendoj de nia kluba podkasto. Hiraŭ aperis la sekva, do la 34-a. En la elsendo aŭdeblas kompreneble kiel ĉiam iom da movadaj aktualaĵoj kaj salutoj. Pri la okazinta en Beniccasim 4-a Iberia Renkontiĝo Agnieszka interparolis kun Juan Catala. Sed tio ne estas ununura interviuo en ĉi-eldono, ĉar aperas tie ankaŭ voĉoj de Michele Gazzola kaj Wandemberg Ribeiro Morais van Zamenhof. Pri siaj impresoj de traeŭropa vojaĝo rakontas Valle kaj Ben, kiuj antaŭ nelonge vizitis nian klubon. Tamen kiel la plej ĉarma rolas certe interviuo kun Kamil, nia kluba denaskulo, filo de aNuś kaj Tomek. Do mi instigas Vin aŭskulti la 34-an Elsendon de Varsovia Vento.

Por trovi plurajn elsendojn bonvolu iri al paĝaro de Varsovia Vento.

HELA!

Jes, proksimiĝas jam Humura Esperantista Libera Aranĝo :) Tie ni ripozos, stultumos, plaĝumos, filmumos… Sed ja, kiucele mi skribu pri tio? Simple vidu:

[Ĉi-tie troviĝas la filmeto. Se vi ne vidas ĝin (ekzemple ĉe RSS-fluoj), bonvolu iri al mia blogo.]

Plurajn filmojn serĉu ĉe VideoGoogle ;)

ATENTU! HELA celas junularan etoson: agrablan pason de tempo, frenezan ludon dum tago kaj nokto. Se vi bezonas specialan trankvilecon, televidilon aŭ hotelan komforton, ni petas - elektu alian aranĝon!

Detaloj troveblas ĉe HELA.pej.pl

Malfacila ellitiĝo

Jes, ankaŭ mi, verŝajne same kiel multaj havis problebon kun lunda ellitiĝo. Unue por tio, ke lunde mi havas lecionon en la universiatato multe tro frue (je la naŭa, sed universitato foras). Sed dua kaj pli grava ĉi-lunde kialo estis tempo-ŝanĝo. Nokte iner sabato kaj dimanĉo ni perdis unu horon de dormo, kiun ni “rericevos” aŭtune. Tamen la efikoj sentiĝis ĉe mi nur lunde, ĉar ja kompreneble dimanĉe mi tute fajfis pri horo de ellitiĝo ;)

Kiel ĉe ĉiu tempo-ŝanĝo venas la demando: kiucele tio okazas? Efektive neniu vere sias. Ideodoninto celis ŝpari vakson en kandeloj. Tamen laŭ la esploroj farataj de universiatatoj kaj laŭ statistikoj de energi-liverantoj, la efiko estas tute mala. Pro tempo-ŝanĝo ni ne ŝparas energion sed uzas ĝin iom pli multe ol normale. Multajn problemojn tio kaŭzas por trajnoj, aviadiloj ktp. Sekvante amaskomunikiloajn informojn, la afero ŝajnas esti tute simpla. Ĝenerale plej multo de la fakuloj konsentas, ke tempo-ŝanĝo estas stultaĵo kaj valorus ĝin nuligi. Tamen malgraŭ tio ĉiam venkas alkutimiĝo kaj brila argumento, ke “aliaj ankaŭ tiel faras”.

Iel ŝajnas al mi, ke nenio ŝanĝiĝos kaj post jarduono, kaj post jaro, kaj ankoraŭ longe amaskomunukiloj denove publikigos sensaciajn aktualaĵojn pri sensenceco de tiu kutimo…

Belorusio vokas helpon

Okuloj de la tuta mondo turinitaj estas direkte de Tibeto. Tamen similaj kuelaĵoj okazas jam de kelkaj tagoj en Belorusio.

Marde milico en Minsko dispelis kelkmilpersonan manifestacion de opozicio. Arestitaj estis 30 homoj, laŭ la registaro, kaj pli ol 100 laŭ la opozicio. Multaj trafis al ĉefurbaj hospiptaloj. La demonstracion organizis demokratiaj organizaĵoj por omaĝi la 90-an proklamdatrevenon de la Bjelorusa Popola Respubliko. Ili traktas la 25-an de marto kiel tagon de sendependeco.

Sekvan tagon komenciĝis traserĉado en redaktejoj kaj en loĝejoj de ĵurnalistoj de sendependaj amaskomunikiloj. Arestitaj estis ĉirkaŭ 30 homoj, ĵurnalistoj de radio Svoboda, radio ERB (Eŭropa Radio por Belorusio), agentejo BielaPAN kaj polaj radio Racja kaj Bielsat TV.

Pro scivolemo mi aŭskultis mardan, merkredan kaj ĵaŭdan pollingvajn elsendojn de la ŝtata belorusa radio. Ĉu ili almenaŭ unufraze mencios pri la okazaĵoj? Ĉu almenaŭ malveran informon peros? Tute ne… Belorusa socio vivas en feliĉo kaj prospero, evoluiĝas kunlaboro kun Kubo, Libio kaj landoj de Proksima Oriento. La ŝtato nur iomete suferas pro usonaj sankcioj…

Ĉu en Minsko devas okazi Olimpikaj Ludoj, por ke la mondo tion rimarku?

Bonvenon ĉe mia blogo!

Do jen fakte mia unua provo lanĉi blogon. Ĝis nun mi neniam kuraĝis fari tion pro malcerto, ke mi kapablos sufiĉe regule redakti ĝin. Tamen foja bezono iel esprimi siajn pensojn pri diversaj aferoj ĉiam instigis min al tio. Kiel la fina istigo rolis mia aliĝo al Ipernity, kies unu el ĉefaj partoj estas ĝuste blogo. Post 2 provaj artikoloj mi decidis, ke Ipernity ne plaĉas al mi kiel blog-sistemo. Do mi esploris aliajn kaj el ĉiuj WordPress ŝajnas la plej kongrua al miaj bezonoj. Mi esperas, ke kiel verŝajne multaj komencantaj blog-verkantoj, tuj post blog-lanĉo, mi ne eksentos subitan malaperon de ideoj, pensoj esprimindajn kaj tiuspeca urĝa bezono. Tamen mi donas al mi mem provepriodon, kiam mi ne tro popularigos ĉi tiun blogon, ĝis kiam mi ne certos, ke mi intencas daŭre redakti ĝin. Inter la ĉefaj temoj pritraktataj en mia blogo certe troviĝos informoj pri E-movadaj aferoj kaj precipe pri agado de Pola Esperanto-Junularo kaj Varsovioa Vento, pri Esperantaj aranĝoj, kiujn mi konorganizas aŭ partoprenas kaj pri miaj Esperantaj vojaĝoj. Certe multan atenton mi donos ankaŭ al politiko. Jes mi scias, ke multaj, post vorto “politiko” klakis ikson, en la supra-dekstra parto de ekrano, sed eble ankaŭ kelkaj reagis tute male ;) Laŭbezone aperos kompreneble ankaŭ aliaj temoj. Do, ŝajne ĉio por la komenco kaj nun mi eku organizi aspekton de la blogo…